9 dekabr 2024-cü il
Azərbaycan Dövlət Teatr Muzeyi – 90
09 dekabr 2024-cü il tarixdə Cəfər Cabbarlı adına Azərbaycan Dövlət Teatr Muzeyinin yaradılmasının 90 illik yubileyinə həsr olunmuş tədbir keçirildi.
Tədbirdə Azərbaycan Respublikası Mədəniyyət Nazirinin müavini Murad Hüseynov, görkəmli sənət adamları, elm və mədəniyyət xadimləri, media nümayəndələri iştirak etdilər.
Giriş sözü ilə tədbiri muzeyin direktoru, Əməkdar mədəniyyət işçisi Sevinc Mikayılova açdı. O, Azərbaycan teatrının tarixi haqqında qısa məlumat verdi və bu tarixi özündə ehtiva edən Dövlət Teatr Muzeyinin keçdiyi inkişaf yolundan danışdı. Sonra muzeyin zəngin tarixini əks etdirən videoçarx təqdim olundu.
Azərbaycan Teatr Xadimləri İttifaqının sədri, Xalq artisti, Dövlət mükafatı laureatı Hacı İsmayılov muzeyin Azərbaycan teatr tarixindəki əhəmiyyətli rolundan danışdı, milli teatr tarixinin təbliği sahəsində xidmətlərinə görə və 90 illik yubileyi münasibəti ilə İttifaqın Fəxri fərmanını Sevinc Mikayılovaya təqdim etdi.
Tədbirdə çıxış edənlər – Əməkdar incəsənət xadimləri, Sənətşünaslıq doktorları, professorlar Məryəm Əlizadə, İlham Rəhimli, Xalq artisti, rejissor Mərahim Fərzəlibəyov, Azərbaycan Dövlət Akademik Milli Dram Teatrının bədii rəhbəri, Əməkdar incəsənət xadimi, Dövlət mükafatı laureatı Mehriban Ələkbərzadə, Xalq artisti Nurəddin Mehdixanlı, Muzey Sərvətləri və Xatirə Əşyalarıın Elmi Bərpa Mərkəzinin direktoru, Əməkdar mədəniyyət işçisi Zərifə Məlikova, C.Cabbarının ev muzeyinin direktoru, Əməkdar mədəniyyət işçisi Qəmər Seyfəddin qızı, Azərbaycan Musiqi Mədəniyyəti Dövlət Muzeyinin drektoru, Əməkdar mədəniyyət işçisi Alla Bayramova, Azərbaycan Milli Elmlər Akademiyasının əməkdası, Filologiya üzrə fəlsəfə doktoru Nəzakət Qafqazlı Teatr Muzeyinin rəhbərliyini və muzey əməkdaşlarını yubiley münasibətilə təbrik etdilər.
Tədbirdə Azərbaycan Dövlət Akademik Opera və Balet Teatrının və Azərbaycan Dövlət Akademik Musiqili Teatrının aktyorlarının ifasında bədii kompozisiyalar təqdim olundu. Sonda xatirə şəkilləri çəkildi.
