6 iyun 2023-cü il
Azərbaycanın görkəmli rejissoru, pedaqoqu, ictimai xadimi - Zəfər Əlipaşa oğlu Nemətovun doğum günüdür
Allah rəhmət eləsin!
Z.Nemətov 1931-ci ildən 1941-ci ilə kimi Azərbaycan Dövlət Gənc Tamaşaçılar Teatrında aktyor, 1942-ci ildən - 1953-cü ilə qədər quruluşçu rejissor, 1954-cü ildən 1969-cu ilə kimi isə baş rejissor vəzifəsində çalışmışdır.
Gənc Tamaşaçılar Teatrında quruluş verdiyi tamaşalar "Məlik Məmməd" (Ə.Abbasov)
"Müfəttiş" (A.Qoqol)
"Qaraca qız" (A.Şaiq)
"Yaşar" (C.Cabbarlı)
"Anacan" (Y.Əzimzadə)
"Romeo və Culyetta" (U.Şekspir)
"Komsomol poeması" (S.Vurğun)
"Əlvida Hindistan" (Q.Rəsulov)
"İki həyat" (R.İsmayılov)
Zəfər Nemətovun yaradıcılıq və pedaqoji fəaliyyəti ilə yanaşı, ictimai fəaliyyəti də böyük bir mərhələ təşkil edir. Azərbaycan Teatr Cəmiyyətinin 1960-cı ildə keçirilən qurultayında Cəmiyyətin sədr müavini seçilmiş Zəfər Nemətov ömrünün sonuna qədər bu vəzifədə işləyib. Azərbaycanın görkəmli sənətkarları Mərziyə Davudova, Mustafa Mərdanov və Mehdi Məmmədovla çiyin-çiyinə çalışaraq, qocaman sənət ocağının tarixi ənənələrinin qorunması və inkişaf etdirilməsi naminə səylərini əsirgəməyən Zəfər Nemətov sənət adamlarının iştirakı ilə toplantıların keçirilməsi üçün möhtəşəm tamaşa salonuna, kiçik zala, məşq və qrim otaqlarına və dövrün tələblərinə cavab verən digər əlverişli şəraitlərə malik binanın tikilməsində böyük əmək sərf edib. Hazırda Azərbaycan Teatr Xadimləri İttifaqının yerləşdiyi inzibati bina ulu öndər Heydər Əliyevin himayədarlığı, Azərbaycanın görkəmli sənətkarları Mustafa Mərdanov və Zəfər Nemətovun Cəmiyyətə rəhbərlik etdikləri dövrdə, onların gərgin əməyi sayəsində ərsəyə gəlib. Zəfər Nemətov Cəmiyyətdə çalışdığı illərdə Azərbaycanda teatr sənətinin inkişafı istiqamətində Teatr Cəmiyyətinin çoxşaxəli fəaliyyət prinsiplərinin həyata keçirilməsi və Cəmiyyətin ölkədə gedən teatr prosesinin fəal iştirakçısına çevrilməsi üçün qüvvə və bacarığını əsirgəməyib.